Meri Dhadkan Ladkhadati Hai!!

Tumse milkar tabiyet apni, ab ghabrati hai,
Aaj fir meri baton me, meri dhadkan ladkhadati hai.

Adhuri si zindagi se, do pal tum chura lo,
Mere khayalon ko aaj, dulhan tum bana lo,
Aaj dil ki zameen par, khamoshi si lahrati hai,
Aaj fir meri baton me, meri dhadkan ladkhadati hai.

Hosh kahta hai takalluf hai, ehsas nahi,
Tu kareeb hai lekin, mere dil ke paas nahi,
Sunsaan galiyon se raaton ko, teri aawaz ati hai,
Aaj fir meri baton me, meri dhadkan ladkhadati hai.

Lagta hai dar, hai aaj koi baat hone ko,
Hai fir se mere paas, aaj kuchh khone ko,
Teri judai ke dar se, meri rooh thartharati hai,
Aaj fir meri baton me, meri dhadkan ladkhadati hai.


Meri fikra me tum, ansoo bahaya na karo,
Mujhe khayalon me la, khud ko sataya na karo,
Mujhe aaj fir se, meri zindagi bulati hai,
Aaj fir meri baton me, meri dhadkan ladkhadati hai.

shashank chandra.